高登仔求婚　講心唔講金

港男Victor勁洗40萬求婚，向全宇宙宣布同女友Stephanie BB拉埋天窗，單新聞一出立即成為全城焦點，港男港女熱鬧討論之際，阿潮都收到BB豬的WhatsApp：

BB豬，你睇吓！租架直升機拉banner求婚，好冧冧啊！個女仔咁幸福，羨慕死人！

阿潮當然知道BB豬想暗示啲咩，但港男Victor的離地做法，阿潮實在唔buy。

先唔講隻價值20萬的1.5卡鑽戒，用15萬租架直升機，拉著塊「籃球場面積」咁大的banner，係維港上空繞場一周，「呼」一聲飛走咗，唔講仲以為係政府飛行服務隊架直升機趕住飛去救山火。

▲ 相片來源：香港高登

連埋租酒店海景房、攝影師，埋單合計差不多40萬，碌卡碌到一頸血。被爆任職高級經理、人工有5位數字的Victor，究竟月賺10,000元定99,999元冇人知，阿潮懷疑5位數字係用英鎊或美金做幣值，否則唔睇戲、唔同BB豬去日本，我都有排未儲到40萬來求婚！

阿潮深知凡係女仔都中意浪漫，Victor的Stephanie BB估計成為不少港女羡慕的對象，港男如何自救呢？幸好呢個世界有萬能的fb，還有接近神一樣的「高登仔」。

嗱！！真係有高登網民教用5萬元租直升機求婚，呢類窮人套餐，先係最啱我呢啲人工真正只有5位數字嘅低級小職員！

窮人福音：高登仔求婚價目表

平平地買隻大大粒3萬元的鑽戒、9千幾元包架直升機飛15分鐘，加埋一樣有海景嘅洲際套房、攝影師，埋單都只係5萬幾元，差不多慳足10倍。

仲想平D，阿潮剛發現Uber仲有免費直升機服務，只要抽到，這些機會就是我的！

諗諗吓，阿潮仲可以額外出多一筆錢，請型過阿潮少少嘅王敏德做機師，有信心BB豬一定會好喜歡！

至於結婚相，邊洗去到無雷公咁遠嘅冰島影，阿潮聽《羅生門》知道，係冰島對岸嘅福島影，一樣可以拍出味道！

依家潮流興玩三部曲，作為港男，阿潮衷心祝福Victor，唔洗跌入男人最痛三部曲：

40萬求婚>冇錢還卡數>葉謝鄧見！

結婚呢家嘢，同賺錢一樣，急唔來嘅，BB豬恨嫁嘅，阿潮有信心出4千元都可以求得成婚。

阿潮都係努力食麥記、幫BB豬換埋剩低個689隻迷你兵團先！

撰文：潮人

我叫阿潮，係一個人，來自潮洲。低調啲可以叫阿潮，俾面就叫聲潮人，鍾意寫潮文，香港發生咩事我都寫，潮文乜乜乜。